KAAPSTAD EN OMGEWING MET RETOERVLUGTE
- Op sy vaart om die wêreld, in die sestiende eeu, het Sir Francis Drake in sy dagboek onder meer van die Kaap geskryf: “A most stately thing, and the fairest Cape we saw in the whole circumference of the earth”. Kaapstad, die oudste stad in Suid-Afrika, word ook “Die Moederstad” genoem. Vir eeue lank al word die skoonheid van Kaapstad en die Kaapse Skiereiland besing. DAG 1 Ons reis begin met ‘n vlug na Kaapstad. Ons vertrek vanaf die Garden Court Hotel in Hatfield en reis na die lughawe waar ons vertrek na Kaapstad. In Kaapstad besoek ons Kirstenbosch en bewonder hierdie uitstaande botaniese tuin met sy bome en groen grasperke, voorwaar ‘n lushof! Kirstenbosch is sowat 560 ha groot en daar is meer as 6000 boom- en plantspesies aangeplant. Die tuin is vernoem na JF Kirsten wat een van die eerste huise op die landgoed gebou het. Die boomslangroete is ‘n plankvoetpad hoog bokant die bome met mooi uitsigte oor die tuin. In die middag bring ons ‘n besoek aan die Groote Schuur Hospitaal waar ons ‘n begeleide toer doen deur die Chris Barnard Museum. Daarna arriveer ons by ons oornagpunt en ontspan heerlik tot aandete. Aandete en oornag Kaapstad. DAG 2 Ons reis vanoggend na Kaappunt. Die twee oseane, soos baie mense nog steeds glo, kom nie hier bymekaar nie maar wel by Kaap Agulhas. Die bobbejane wat by Kaappunt aangetref word, is uniek in die sin dat hulle die enigste bobbejane in die wêreld is wat hul kos uit die see kry! Na ‘n wonderlike dag keer ons terug na ons oornagpunt. Aandete en oornag Kaapstad. DAG 3 Vandag besoek ons Tafelberg. Hierdie wêrelderfenis gebied is een van die nuwe Sewe Natuur Wonders van die wêreld en die berg is reeds 350 miljoen jaar oud. Die nuwe kabelkarprojek het R80 miljoen gekos en is in 1997 voltooi. Dit neem ongeveer 5 min om 65 passasiers na bo te neem. Die vloer van die kabelkar roteer terwyl dit na bo reis. Ons verwyl ons tyd op die berg, stap die sirkelroete en kyk na al die pragtige uitsigte vanaf die uitkykpunte. Ons besoek ook die Two Oceans Akwarium van wêreldklas gehalte. Miljoene liter seewater word op ‘n daaglikse basis hier ingepomp wat die tuiste van see kreature, groot en klein, is. In die namiddag geniet ons die Waterfront met sy werkende hawe. Ons besoek die brug en sien hoe skuif dit weg wanneer daar bote inkom. Dit is ‘n besoekpunt met ‘n eiesoortige atmosfeer. Soms staan jy verstom oor ‘n jong man wat soos ‘n wafferse operaster sy gehoor, onder ‘n boom op ‘n krat, aan sy voete het. Gaan sit vir ‘n oomblik op ‘n bankie, kyk uit oor die water en beleef die dinge wat rondom jou gebeur! Aandete en oornag Kaapstad. DAG 4 Vandag vat ons die pad na Franschhoek en ons besoek die statige Hugenote Monument en Museum waar u u familiegeskiedenis kan gaan navors. Ons maak ‘n draai in die dorp en besoek die belgiese sjokolade winkel. Hierna ry ons in die rigting van die Paarl en besoek die Taalmonument wat op ‘n koppie lê en ons proe wyn by Simonsvlei. Ons besoek ook Fairview Kaas. Ons keer terug na Kaapstad na ‘n heerlike dag. Aandete en oornag Kaapstad. DAG 5 Ons vertrek na ontbyt en neem die kuspad deur Seepunt, Kampsbaai, Llandudno na Houtbaai waar ons op ‘n boot klim na Duiker Eiland waar duisende Kaapse Pelsrobbe leef. Terug by Houtbaai nuttig ons ‘n heerlike middagete van vis of kalamari met skyfies (eie koste). Volgens ons is dit die beste in die land! Ons besoek Mineral World, ‘n wonderwêreld van half edelgesteentes en juwele. Hier kan mens na hartelus ‘n aandenking koop, dis goeie waarde vir geld en billike pryse. Ons sien ook die beroemde “Just Nuisance” se standbeeld by Vishoek. Aandete en oornag Kaapstad. DAG 6 Na ‘n heerlike ontbyt verken ons die Moederstad. Ons besoek die Groote Kerk waar ‘n gids vir ons meer vertel van die geskiedenis van die Kerk. Volgende op ons program is die St Georges Katedraal met sy pragtige roosvensters. Ons besoek die Suid Afrikaanse museum en indien daar ‘n vertoning is by die Planetarium sal ons dit bywoon. A andete en oornag Kaapstad. DAG 7 Na ontbyt vertrek ons na Seinheuwel om vir oulaas die mooi uitsig daarvandaan te geniet. Ons besoek die Kompanjiestuine en besigtig die statige geboue, u kan u ook self bederf met ‘n vroeë middagete in die restaurant. Om 12:00 vertrek ons na die lughawe vir ons vlug terug na Johannesburg. Ons keer terug na die Garden Court Hotel en arriveer ongeveer 6nm by die hotel met mooi herinneringe aan die Mooie Kaap! · R80 pp fooitjie vir gidse by besoekpunte en bagasiehantering tydens die toer · R80 pp bydrae vir busbestuurder Belangrik
-
- Retoer vlugte JHB - CPT
- Luukse bus in Kaapstad
- Goeie verblyf in Kaapstad
- Twee etes daagliks - ontbyt en aandete
- Toegangsgelde soos aangedui op program
- Vervoer na lughawe en terug tot by Garden Court Hotel
-
- Uitgawes van persoonlike aard
- Middagetes
- R80 pp fooitjie vir bagasiehantering tydens die toer
- R80 pp bydrae vir busbestuurder
-
Toer datum 15 - 21 April 2020 Vertrekpunt Garden Court Hotel Hatfield Vertrektyd Sal bevestig word Prys R11300 per persoon wat deel Enkelbybetaling R2400 per persoon wat nie deel nie Deposito R2000
