Ons vertrek 23 Desember om 06:00 uit Pretoria en oornag die eerste aand en laaste aand in Colesberg.  Ons arriveer die volgende dag by ons bestemming in Stellenbosch waar ons vir die volgende 10 dae oornag.

Ons besoek baie interessante plekke en al die toegangsgelde is ingesluit in die prys:

• Kersoggend erediens in die NG Moedergemeente van Stellenbosch. Jagluiperd Teëlstasie
• Mooiberge Aarbeiplaas - ons gaan ons eie aarbeie pluk in die land wat vol voëlverskrikkers is
• Tafelberg - ons gaan met die kabelkar op na Tafelberg waarvandaan ons ‘n panoramiese uitsig het. Ons sal Tafelberg op meer as een geleentheid probeer besoek indien die weer nie gunstig is nie.
• Seinheuwel - besigtig Kaapstad ook vanaf Seinheuwel
• Ons besoek die Tuine waar talle historiese geboue geleë is asook die museum.
• Ons bring tyd deur in Kirstenbosch, die wêreldbekende Botaniese Tuine van Kaapstad
• Ons besoek Houtbaai en u kan smul aan die lekker vars vis by Mariners Wharf.
• Ons onderneem ook ‘n bootvaart vanaf Houtbaai na Duiker Eiland om na die robkolonie te gaan kyk.
• Ons besoek Kaappunt en verlustig ons in die natuurskoon. Oppad terug besoek ons World of Gems en Just Nuisance se standbeeld.
• Die Kasteel met sy vyf bastionne
• Die waterfront met sy eiesoortige atmosfeer is ook een van ons besoekpunte. ‘n Opsionele toer na Robbeneiland met ‘n boot is ook moontlik.
• Die Two Oceans Akwarium is ‘n ware belewenis en is ook op ons program.
• Ons besoek ook die Hugenote Monument en die museum by Franschhoek en spandeer tyd in die dorp
• Die Taalmonument in die Paarl
• Ons proe wyn by die Bergkelder ‘n baie interessante wynkelder wat in die berg gebou is
• Stellenbosch en sy historiese Burgerhuis asook oom Samie se winkel en ons besoek die speelgoed museum
• Kaapse Klopse op 2 de nuwe jaar
• Rhodes se Monument naby die Universiteit van Kaapstad
• Canal Walk en Intaka Wetland.
• Skoenlapperplaas by Klapmuts

Indien u onder 60 jr oud is sal u ‘n bybetaling van R450 moet maak vir die uitstappies waar pensioenarispryse van toepassing is. (Bring ook asseblief u ID dokument saam)